Hiob 23 vo 42
- von Rico Loosli 6934 Bioggio
-
Zugriffe: 541
Hiob 23 vo 42
23:1 Hiob erwideret:
2 "Au hüt wird ich mich hartnäckig beklage.
Mini Chraft isch erschöpft vor luter Süüfze.
3 Weni doch nur wüsst woni Gott finde!
Ich wür zu sim Wohnort gah.
4 Ich wür ihm min Rechtsfall verteile
und mis Muul mit Argument fülle.
5 Ich wür erfahre wie er mir antwortet,
und druf achte, was er zu mir seit.
6 Würd er sini grossi Macht ufbiete zum mit mir striite?
Nei, bestimmt würd er mich alose.
7 De Ufrichtig chönnt döt de Sachverhalt mit ihm kläre,
und min Richter würd mich ii für all mal freispreche.
8 Gang ich aber uf oste, isch er nöd dete,
und chumi zrugg, findi ihn nöd.
9 Ischer links tätig, erblick en nöd,
und wändet er sich nach rächts, au dänn gsehni ihn nöd.
10 Doch er kennt de Wäg woni ihgschlage han.
Nachdem er mich prüeft het wird ich als reins Gold füre gah.
11 Mini Schritt sind sin Fuessspure genau gfolgt.
Ich bin uf sim Weg blibe, ohni devo abzwiiche.
12 Vom Gebot sinere Lippe hani mi nöd entfernt.
Ich han sini Wort no besser ufbewahrt als mers erwartet het.
13 Het er öppis bestimmt - wer chan en dänn devo abbringe?
Wäner öppis wett mache, tuet er's.
14 Denn das woner für mich beschlosse het, wird er au völlig usfüehre,
und er haltet viel so Sache parat.
15 Darum bin ich sinetwäge ängstlich.
Wänn ich a ihn denke wachst mini Furcht.
16 Gott het mer de Muet gnoh,
de Allmächtig het mich ängstlich lah werde.
17 Doch die Finsternis het mi nonig zum schweige bracht,
au ned d Düsterheit wo mis Gsicht bedeckt.