Hiob 18 vo 42
- von Rico Loosli 6934 Bioggio
-
Zugriffe: 521
Hiob 18 vo 42
18:1 Bịldad, wo Schuchịter, erwideret:
2 "Wie lang gahts no, bis ihr mit eune Rede ufhöred?
Zeigt chli Verstand, de chömmer rede.
3 Warum söttemer als Tier agseh werde
und i eure Auge als Dummchöpf gälte?
4 Sälbscht wänn Du Dich vor Wuet zerfleisch –
wird d Erde öppe dinetwäge entvölkert werde
oder de Felse vo sinere Stell rücke?
5 Ja s Liecht vom schlächte Mänsche wird usglöscht werde
und d Flamme vo sim Füürli wird nöd lüchte.
6 Das Liecht i sim Zelt wird gwüss dunkel werde
und d Lampe über ihm wird usglöscht.
7 Sini chräftige Schritt werded chürzer
und sin eigene Rat wird en zuefall bringe.
8 Denn sini Füess werdet en ines Netz lenke
und uf dem Mäschli wird er laufe.
9 En Fall wird en a de Ferse packe.
E Schlinge wird en fange.
10 En Strick isch für ihn ufem Bode versteckt
und en Fall befinded sich uf sim Pfad.
11 Vo allne Siite ängstige ihn Schrecke
und heftet sich a sini Färse.
12 Seine Kraft verseit
und s Unglück wird en zum Schwanke bringe.
13 Sini Hut wird zerfresse.
Die tödlichst Chrankheit verzehrt sini Gleder.
14 Us de Sicherheit vo sim Zelt wird er fortgrisse
und zum König vo de Schrecke abgführt.
15 Frömdi wärde i sim Zelt läbe.
Schwefel wird uf sis Dihei gstreut werde.
16 Sini Wurzle under ihm werded vertrochne
und sini Zwääg über em verdorred.
17 Die Erinnerig a ihn wird vo de Erde verschwinde
und uf de Stross wird mer sin Name nöd kennä.
18 Mer wird en us em Liecht i d Finsternis jage
und vom fruchtbare Land vertriibe.
19 Er wird kei Nachwuchs und kei Nachkomme unter sim Volk ha
und a sim Wohnort wird en niemert überläbe.
20 Wenn si Tag chunt werded d Mensche im Weste entsetzt si,
und d Mensche im Oste wird s Graue packe.
21 Das passiert mit de Zelte vo dem wo verchert handlet,
und mit dem Ort dem wo Gott nöd kennt het."